Davida Għandha Għarus
Wara li tkeċċiet mingħand in-Nutar, il-ħruġ ta' Davida fit-toroq ma tantx baqa jidher spiss, u dan beda jħasseb lil kullħadd. Kien hemm min ġie jistaqsini biex jara ġraliex xi ħaġa imma jien wara l-prasura li għamilt meta qajjimt raħal sħiħ, farfart minnha u biex inkun għidt kollox, għal darba ħassejt moħħi trankwill.
Imma Lisa malajr qatgħat l-għatx bil-perżuta lil dawk l'erbgħa sendikajri bħalha, għax skond hi Davida kellha għarus. Kellha ħabta kif toħroġ bihom imma skond dak li qalet, kienet rat xi raġel dieħel d-dar ta' Davida bil-lejl. Pruvajt nimmaġina li kieku kien vera kif kienet tkun ħajjitha, imma dal-ħsieb mill-ewwel tajjartu min moħħi. Għax bir-rispett kollu min kien se jissaport jgħix ma' persuna bħala. Vera li kellha qalbha tajba imma kienet fitta u tosta ukoll.
Jum fost l-oħrajn wara li Patrick kien ġie bit-tfal mid-duttrina ikkonfermali li dak li bdiet tgħidli Lisa kien minnu. Mid-dar ta' Davida kien ra raġel ta' xi ħamsin sena ħiereġ. "Possibli? Kif ma qaltli xejn?"
"Eeee, mid-dehra Davida mhux kollox tgħidlek imma li jaqblilha," inkieni Patrick. "Tagħmel hi, fl-aħħar mill-aħħar jien għandi raġel u m'għandix bżonn ieħor," għidtlu waqt li mort ħdejh dawwart idi m'għonqu u bistu fuq xufftejh. "U ma tarax ħa nċedi mara bħalek lil xi ħadd," qalli bi tbissima.
Għaddiet xi ġimgħa u mingħand Davida ma smgħajt xejn iktar, imma r-raħal kien mixgħul bix-xniegħa li fl-aħħar kienet sabet raġel. Min jgħid ħaġa u min jgħid oħra, min jitkaża għax ġa qed jgħix magħha, min jirringrazzja l'Alla li sabet xortijha u min juża l-frażi,"fadlilha żmien ukoll."
Dan id-diskors wasal f'widnejn il-kappillan ukoll.
Il-Ħadd filgħodu morna l-knisja nisimgħu l'quddiesa bħas-soltu. "Kos," ħsibt waħdi,"vera li kulħadd impenjat b'ħajtu, imma il-Ħadd, ħadd minna ma kien jitlef il-quddiesa. U l-kappillan jista' jagħmel quddiesa waħda għax kważi kulħadd kien jiġi għal quddies tad-disa'."
Daħlet Davida, u kulħadd baqa' jħares lejha, ma kinitx waħedha u bħas-soltu ġiet bilqegħda ħdejna. Hekk kif poġġew bilqegħda, daqqet il-qanpiena. Il-quddies bdiet u għal ftit in-nies neħħew l'attenzjoni minn fuq Davida. Wasal ħin l'omelija u kulħadd poġġa bilqegħda jisma', "Turix l'id il-leminija x'għamlet ix-xellugija. Sentenza li fiha x'tomgħod. Għalfejn kull ma nagħmlu għandna nxandruh? Għalfejn dejjem irridu l-prosit. F'dan ir-raħal għandna persuna li biex ma x-xandarx l-att ta' karita' li kienet qed tagħmel sfat vittma ta' ħafna minnkom.
Dak I-raġel Li hemm bilqegħda ħdejn Davida m'hu ħadd ħlief iz-ziju tiegħi li jgħamilli żjara minn Għawdex, għandi ma stgħajtx inżommu u kont tlabt lil Davida tagħmilli dan il-pjeċir. Kultant ilsiena nħalluh jikkmandana wisq."
Għal dan il-kliem tal-kappillan ħafna dehru jbaxxu rashom, imma Lisa inkiss inkiss telqet il' barra. Davida ħarset lejja u minn taħt l-ilsien qaltli, "Eħħ, mur għidlu s-Sur kappillan li jien lil zijuh sirt inħobbu."
28,09,17
Kri
